Тетовските гимназијалци учеа за ЕУ

Тетово, 10 април (МИА) - Учениците од тетовската гимназија „Кирил Пејчиновиќ” во рамките на проектот „Учиме за ЕУ” денеска имаа можност од министерот за здравство Имер Селмани и шведската амбасадорка Урлика Кроненберг – Мосберг да дознаат повеќе за Европската унија.

- Целта на нашата посета е да им кажеме на учениците дека се добредојдени во Европската унија и дека за да стигнат до таму треба да се завршат сите домашни работи. Шведска е цврст поддржувач на Македонија. Шведска ја признава Македонија под уставното име и посакува што побрзо нејзино приклучување кон ЕУ и НАТО, рече шведската амбасадорка Урлика Кроненберг – Мосберг.

Учениците имаа можност да се запознаат со зачетокот и развојот на Европската унија. Покрај ова се говореше и за нашите аспирации, за придобивките како и за обврските кои ќе ги имаме со зачленувањето во Унијата.

- Беше интересен разговорот, имаше интересни прашања. Одговоривме и за промените во образованието кои најмногу ги интересираа учениците како и за сите промени кои се прават на пазарот на трудот. Ова помага младите се повеќе да се запознаат со Унијата бидејќи 95 проценти од граѓаните сакаат да бидеме член на ЕУ, рече министерот за здравство Имер Селмани.

На новинарско прашање за коментар околу најавите за предвремени избори Селмани рече дека тоа е политичка одлука и оти е политичко прашање.

- Сериозните политички партии веќе одлучија, нема да коментирам бидејќи одлуката треба да се донесе во Парламентот, рече Селмани.

Во врска со коронарографот на кардиологија во Скопје кој е во дефект министерот истакна дека има два коронарографа. Едниот функционира и работи, а другиот за неколку дена пак ќе биде во функција бидејќи се нарачани сите потребни материјали од странство од компанијата „Филипс“.