Операта „Цар Самуил“ в петок ќе ги отвори 36. Мајски оперски вечериСкопје, 7 мај (МИА) - Триесет и шестите Мајски оперски вечери в петок ќе бидат отворени со „Цар Самуил“ на Кирил Македонски, која е прва оперска претстава изведена на фестивалот во 1972 година. Режисер е Огњан Драганов од Бугарија, диригент Саша Николовски-Ѓумар, а во насловната улога ќе настапи Игор Дурловски.
На програмата на годинашните МОВ се и оперите „Тоска“, „Боеми“ и „Турандот“ од Пучини, „Лучија од Ламермур“ на Доницети и „Аида“ од Верди, со која традиционално фестивалот се затвора на 31 мај. Покрај оперски претстави, на МОВ ќе бидат изведени и два балета - „Лебедово езеро“ на Чајковски и „Рајмонда“ на Глазунов, како и концерт на Македонската филхармонија, која по повеќе години отстуство се враќа на МОВ со симфониска програма.
Уметничкиот директор на Операта Дејан Прошев на денешната прес-конференција соопшти дека ќе гостуваат солисти од Русија, Украина, Бугарија, САД, Канада и од Италија.
Звучно име на фестивалот е светски познатиот тенор Владимир Галузин, солист на познатиот Марински театар од Санкт Петербург и носител на титулата Народен артист на Русија. Тој на 24 мај ќе настапи во улогата на Калаф во „Турандот“. Познати оперски имиња се и сопранот Фабијана Браво, која ќе ја игра Тоска и Тамара Хаскин, која е првата црнкиња што ќе настапи на Фестивалот и ќе ја игра Аида.
Операта во два чина „Цар Самуил“ повторно е на репертоар по седум години. Во 2001 година, исто така, главната улога ја толкуваше Дурловски. Тој рече дека сега на 31 година поинаку ја доживува оваа опера, како потресна и длабоко емотивна приказна.
- Како бас немам можност да настапувам во насловни улоги, а сега сум посебно задоволен што покрај тоа играм и во национална опера, рече Дурловски.
Сценограф на оваа оперска претстава е Живоин Трајановиќ, а костимограф Елена Дончева. Фестивалскиот оган на 9 мај ќе го запали поранешниот концерт - мајстор Ѓоко Николовски, а во фоајето на МОБ ќе бидат отворени три изложби.
|