Прва награда за уметникот Никола Узуновски на фестивалот „Видео.Ит“ во ТориноСкопје, 2 април (МИА) - Македонскиот уметник Никола Узуновски освои прва награда на конкурсот на фестивалот „Видео.Ит“ во Торино за видеоделото „Моето сонце“. Проектот го опишува процесот на создавање модел за вештачко сонце, од престојот на Узуновски во италијанското место Полинарија во 2008 година, каде што учествуваше во програмата за уметници и научници за истражување на алтернативни енергии, биоекологија и заштита на природата.
„Моето сонце“ е еден од двата уметнички проекта со кои Македонија во јуни ќе се претстави на 53. Уметничко биенале во Венеција.
Наградата во Торино е второ значајно признание за Никола Узуновски за овој проект. На „Триесте контемпоранеа“ тој беше награден и за најдобар млад уметник на Југоисточна Европа во 2007 година.
Фестивалот „Видео.Ит“ се одржа од 25-ти до 27 март во реномираната Фондација „Марио Мерц“ во Торино и одбележа десет години постоење. Учествуваа уметници од Франција, Италија, Грција, Израел, Турција и од Палестина. Фестивалот тематски беше посветен на земјите на Медитеранот, како дел од соработката со Медитеранското биенале на млади уметници, кое во септември ќе се одржи во Скопје.
|