Дожд со грмежи и засилен ветер во Скопје

Скопје, 28 мај (МИА) - По вчерашното невреме, Скопје и вечерва го зафати дожд со грмежи и засилен ветер.

Изминатите 24 часа во главниот град наврнаа 23 литри дожд на метар квадратен. Поплавени беа повеќе сообраќајници, меѓу кои и новата клучка кај „Континентал“. Брзината на ветерот достигна 100 километри на час.

За заштита на посевите во пелагонискиот регион и во околината на општина Ресен, активиран беше и системот за одбрана од град. Испукани беа 20 градобијни ракети. Во Скопје и во другите градски средини не е дозволена интервенција со градобијни ракети. 

За утре метролозите предвидуваат променливо облачно и посвежо време со повремени врнежи од дожд. Ќе дува умерен северозападен ветер. Атмосферата ќе биде нешто постабилна во однос на денес и појава на грмежи е можна само локално во југозападните делови од земјава.