Промовиран спотот „Охрид - град на светлината“ - дел од проектот „Македонија вечна“

Скопје, 2 јули (МИА) - Маркетинг-агенцијата „Њу момент“ денеска го промовираше спотот „Охрид - град на светлината“ (Ohrid - City of Light“) - трет од владиниот проект „Македонија вечна“, кој од денеска ќе се прикажува на Си-Ен-Ен за туристичка промоција на Македонија.

Се работи за видеоприказна за која инспирацијата за насловот е старото име на Охрид - Лихнидос, т.е. град на светлината. Во шеесет секунди се претставени знаменитости на балканската лулка на културата, уметноста и религијата, цркви и манастири, добрата храна и и бисерите, а сето тоа раскажано низ визуелна игра на светлината и сенките.

Спотот е идеја на авториски тим од агенцијата „Њу момент“, изработен по сценарио и режија на Душан Дракалски, директор на фотографија е Слободан Трник-Трн, фотограф Ѓорѓи Клинчаров, а продуценти на спотот се Филип Димитров и Горан Саздановски. Спотот е сниман пет дена и ги прикажува препознатливите локации на Охрид - Плаошник, селото Трпејца, Св. Наум, Св. Перивлепта, стариот град и куќата на Робевци... Во креирањето е вклучена 70-члена екипа, а вкупниот буџет е 80.000 евра.

Во спотот се појавуваат Мето Јовановски, Каролина Гочева и Николина Кујача. Ќе се прикажуваат две веризии на спотот - едната со музика на композиторот Дуке Бојаџиев и втората со музика на групата „Фолтин“.

- Градот е претставен во еден ден. Се трудевме повеќе да опфатиме културни локации, зашто не верувам дека странците ќе посветат многу внимание на плажи, хотели... Ова е претставување на една земја. Сепак, сметам дека направивме примамлив спот, изјави режисерот Дракалски.

- Се трудевме да влеземе сериозно во прашањето на националното брендирање и се трудевме пораката која ќе ја дадеме да биде издржлива и да предизвика емоции, истакна Сашо Пешев, директор на „Њу момент“.

Во рамки на кампањата за промоција на Македонија беше изработен еден носечки спот „Македонија вечна“ на Милчо Манчевски. Потоа Владата распиша конкурс за пет спотови за сегментирано раскажување на приказната за Македонија - спотот на Игор Иванов за туристичко промовирање на земјава, на Манчевски - „Манастирите на Македонија“ и денеска промовираниот спот за Охрид. Остануваат уште два тематски спота - за македонското вино и за археологијата во Македонија.