Брисел, 12 ноември (МИА) - Европскиот парламент денеска усвои резолуција со која се препорачува укинување на визите за Македонија, Србија и Црна Гора од 19 декември годинава наместо на 1 јануари 2010 како што предложи Европската комисија.
Во дебатата што почна доцна синоќа европарламентарците искажаа поддршка за симнувањето на визната бариера за трите земји, а еврокомесарот за правда Жак Баро го оцени овој чин како „историски“.
Известувачот на Европскиот парламент за визната либерализација, словенечката европратеничка Тања Фајон, изрази задоволство поради скорешното укинување на визите за трите земји, чии граѓани, како што посочи, досега беа поизолирани и со поограничени права и слобода на патување од времето на поранешна Југославија.
Резолуцијата што ја изгласа денеска Европскиот парламент не е обврзувачка, но има политичко влијание при носењето на одлуките во ЕУ.
Конечната одлука за симнувањето на шенгенската визна бариера за Македонија, за Србија и за Црна Гора треба да ја донесат министрите за внатрешни работи и за правда на земјите членки на ЕУ на 30 ноември. Одлуката не се носи со консензус туку со квалификувано мнозинство, односно треба да ја поддржат две третини од земјите членки на Унијата. Доколку биде усвоена, одлуката треба да биде објавена во службениот весник на ЕУ, а вообичаено согласно правната процедура, стапува во сила 20-от ден од објавувањето.
ЕК на 15 јули препорача укинување на визната бариера за граѓаните на Македонија, Србија и Црна Гора. Со тоа, државјаните на трите земји веќе нема да мора да поминуваат низ долготрајните процедури за добивање визи и ќе можат слободно да се движат во државите од Шенгенскиот договор. Се оценува и дека олеснетото патување во ЕУ значајно ќе придонесе и кон процесот на евроинтеграција на земјите од Балканот.