Ѓорѓевски: Стогодишнината од раѓањето на Мајка Тереза добар повод папата да ја посети Македонија Скопје, 14 јануари (МИА) - Интензивирањето на културно-просветната соработка меѓу Македонија и Ватикан, овозможувањето на истражувања на Ватиканските архиви, како и продлабочувањето на меѓурелигиската и меѓуцрковната соработка, ќе биде во фокусот на новиот македонски амбасадор во Ватикан Ѓоко Ѓорѓевски.
Во интервјуто за МИА, за досегашниот развој на односите меѓу Македонија и Ватикан, тој посочува дека Светата Столица се вбројува меѓу земјите кои уште од самиот почеток ја поддржаа независноста и самостојноста на Република Македонија.
- Минатата година се навршија петнаесет години од меѓусебното воспоставување на дипломатските односи, иако тоа е сторено под референцата, а не под нашето уставно име. Од друга страна, пак, нашата земја има континуирана поддршка од страна на Светата Столица, посебно во однос на напорите на Македонија за членство во Европската Унија, кое во повеќе наврати јасно е изразено во говорите актуелниот римски понтиф, истакнува Ѓорѓевски.
За можноста Ваткан да помогне за решавање на прашањето за автокефалноста на Македонската православна црква, Ѓорѓевски вели дека Светет Столица гледа на тоа како на интерен проблем на Православната црква. Ватикан будно го следи развојот на настаните уште од самите почетоци, но освен желбата за надминување на спорот преку дијалог во интерес на единството на Православната Црква, а воедно свесна и за комплексноста и комплицираноста на проблемот, таа се дистанцира од директно инволвирање или посредување, потенцира Ѓорѓевски.
Прашан каква е можноста поглаварот на Римокатоличката црква папата Бенедикт Шеснаесетти да ја посети Македонија, тој вели „ние би сакале тоа да се случи оваа година, па тогаш посетата би се совпаднала со јубилејното одбележување на еден век од раѓањето на скопјанката Мајка Тереза“.
- Важноста е дотолку поголема заради фактот дека, по изминати пет години од неговиот избор за папа, тоа би било прва посета на Бенедикт Шеснаесетти на една европска земја која сè уште не е членка на ЕУ или на НАТО, додава новиот македонски амбасадор во Ватикан Ѓорѓевски.
|