Скопје, 9 јуни 2010 (МИА) - Министерот за надворешни работи на Република Македонија, Антонио Милошоски денеска и утре ќе учествува на сесија на Постојаниот комитет на ОБСЕ, што се одржува во Виена.
Во рамките на сесијата, министерот Милошоски во својство на претседавач со Комитетот на министри на Советот на Европа ќе има излагање во кое ќе говори за приоритетите на македонското претседавање со Организацијата што се однесуваат на засилувањето на заштитата на човековите права, јакнењето на интеграцијата со почитување на различноста и промоцијата на младинската соработка, а ќе се осврне и на зајакнувањето на соработката меѓу СЕ и ОБСЕ во областите од заеднички интерес.
Предвидено е шефот на македонската дипломатија да присуствува и на работниот ручек што го приредува делегацијата на Казакстан како актуелен претседавач со ОБСЕ, а на кој ќе бидат и генералниот секретар на ОБСЕ, Марк Перин де Бришамбо, како и дел од амбасадорите на земјите-членки на ОБСЕ.
За време на престојот во Виена, министерот Милошоски ќе оствари средба и со австрискиот министер за европски и меѓународни работи, Михаел Шпинделегер на која ќе се разговара за политичките и економски односи меѓу двете држави, процесот на проширување на ЕУ и во тој контекст, за активностите на Македонија за отпочнување на претпристапните преговори. Се очекува да стане збор и за регионалните и мултилатералните прашања.
Во својство на претседавач со Комитетот на министри на Советот на Европа, министерот Милошоски ќе има и средба и со претставници на Агенцијата за фундаментални права на ЕУ со седиште во Виена.