Виена, 10 јуни 2010 (МИА) – Министерот за надворешни работи на Македонија Антонио Милошоски денеска во Виена во својство на претседавач со Комитетот на министри на Советот на Европа ќе се обрати на Сесијата на Постојаниот комитет на ОБСЕ во Виена.
Како што јави известувачот на МИА, тој ќе говори за приоритетите на македонското претседавање со Советот на Европа кои се однесуваат на засилувањето на заштитата на човековите права, јакнењето на интеграцијата со почитување на различноста и промовирање на младинската соработка.
Тој ќе се осврне и на зајакнувањето на соработката меѓу Советот на Европа и ОБСЕ во областите од заеднички интерес.
Министерот Милошоски денеска во Виена ќе има и работен ручек што го приредува делегацијата на Казахстан како актуелен претседавач со ОБСЕ, генералниот секретар на ОБСЕ Марк Перин де Бришамбао, како и дел од амбасадорите на земјите - членки на ОБСЕ.