Скопје, 29 септември 2010 (МИА) - Евроамбасадорот Ерван Фуере не го коментира процесот на лустрација, но оценува оти вербалната битка која се води со Уставниот суд го поткопува имиџот на Македонија како земја со кандидатски статус за членство во ЕУ.
- Многу пати досега ја напоменавме нашата загриженост во контекст на нападите врз Уставниот суд и неговиот кредибилитет и веруваме дека на тој начин се поткопува владеењето на правото во земјата, рече Фуере по посетата на Агенцијата за супервизија на осигурувањето.
Специјалниот претставник на ЕУ и шеф на делегацијата на Унијата воедно упати апел до политичките лидери да се концентрираат на приоритетите на земјата.
- Апелираме до сите политички лидери да се фокусираат на приоритетите со кои се соочува Македонија, а тоа е независноста на правосудството и јакнење на неговото функционирање на сите нивоа, како и на јакнење на довербата на јавноста кон судството, рече Фуере.