Натамошното истражување на темелите од црква во Струга ќе покаже за кој објект точно се работи

Струга, 4 октомври 2010 (МИА) - Треба да бидеме многу внимателни кога е во прашање истражувањето на просторот во Струга каде во петокот беа откриени темели од сакрален објект, вели директорот на Музејот во Струга Сашо Цветковски.

Според него, треба да се внимава на секој детал од истражувањата, бидејќи Струга е чувствително подрачје и мултиетничка средина.

- На тоа подрачје отсекогаш постоел сакрален објект. Изворите со кои располагаме укажуваат дека тука имало црква уште во 50-те години на минатиот век.Тоа стои и во извештајот на тогашниот директор на музејот во Охрид Васил Ахтов. Проблем беше само утврдувањето на точната позиција каде се наоѓала црквата, бидејќи во изминативе години таму се вршени повеќе градежни зафати, истакнува Цветковски.

Тој додава дека истражувањата кои ќе продолжат во наредниот период ќе утврдат за кој објект точно се работи.

- Кога ќе продолжат истражувачките активности и со кое темпо тие ќе се одвиваат зависи од одлуката на Управата за културно и историско наследство. Она што е важно е дека просторот е обезбеден, смета директорот на Музејот во Струга Цветковски.