Скопје, 22 октомври 2010 (МИА) - Во насока на унапредување на билатералните односи меѓу Македонија и Црна Гора денеска во Скопје премиерите Никола Груевски и Мило Ѓукановиќ потпишаа договори за економска и социјална соработка и спогодби за соработка во образованието и науката и технологијата.
Наjaвено е скоро потпишување на спогодби за заштита на инвестициите што ќе претставува основа за унапредување на економските односи меѓу Македонија и Црна Гора, како и за соработка во контекст на пристапување на Црна Гора во ЕУ. Ѓукановиќ и Груевски разговарале и за воспоставување директна авиолинија, што би придонело за динамизирање на туристичката и севкупната соработка.
Двајцата премиери изразија задоволство од традиционално-пријателските односи меѓу двете земји посочувајќи дека тие никогаш не прекинале и покрај кризата во регионот што се случи пред десетина години.
- Со потпишувањето на договорите освен зајакнувањето на договорната состојба, Македонија и Црна Гора даваат јасна согласнот дека билатералната соработка претставува пат и кон европската интеграција за што Република Македонија дава целосна и безрезервна поддршка на Подгорица, изјави Груевски. Македонија останува да биде активен поддржувач и на напорите на Подгорица во процесот за членство во НАТО. Имајќи предвид дека Македонија е чекор понапред во однос на НАТО и ЕУ, ние даваме целосна поддршка и се ставаме на располагање за споделување на искуствата од минатото со Црна Гора, изјави премиерот.
Груевски го информирал Ѓукановиќ и за прашањето за разликите околу името со Грција и дека Македонија останува целосно посветена за што поскоро разрешување на ова прашање.
- Македонија беше и останува да биде активно и конструктивно ангажирана во разговорите под покровителство на ОН со цел изнаоѓање на заедничко прифатливо решение кое нема наштети на националната, јазичната, културната самоидентификација на македонскиот народ и кое што би било прифатливо за мнозинството граѓани, изјави Груевски. Сите отворени прашања во регионот, додаде тој, можат да бидат надминати со дијалог, разбирање и меѓусебна соработка.
Црногорскиот премиер Ѓукановиќ изрази жалење бидејќи, како што рече, „дојде до застој во евроатлантскиот процес на Македонија“.
- Не го третираме ова прашање важно само за Македонија, туку прашање кое ја засега и стабилноста во регионот. Клучниот проблем на регионот во кој живееме е нестабилноста и за жал, имаме премногу докази од минатото и од сегашноста дека нашите инструменти за стабилност не се доволно сигурни, рече Ѓукановиќ. Одговор на тоа, според него, е сите држави од регионот што поскоро да станат членки на ЕУ и НАТО.