Њујорк/Скопје, 16 ноември 2010 (МИА) - Македонскиот јазик од синоќа повторно е вратен во личната карта за Македонија во регистарот на ОН.
Во графата за јазик повторно е впишан терминот
Macedonian, кој минатата недела поради неовластено интервенирање исчезна од личната карта на земјава. Корекцијата е направена по реакцијата на МНР и македонската мисија во ОН до кабинетот на генералниот секретар Бан Ки-мун и Секретаријатот, од каде беше добиено уверување дека на Светската организација останува на своите принципи и почитување на воспоставената пракса во однос на употребата и именувањето на македонскиот јазик.
МНР го оцени бришењето на македонскиот јазик како субверзивен чин и најави дека тоа ќе биде дополнителен мотив за што погласно промовирање на македонските национални и културни обележја на меѓународен план и за одбрана и промоција на македонскиот национален идентитет.
Во регистарот на ОН за Република Македонија пишува дека јазикот е македонски, краткото и официјалното име на државата е „поранешна југословенска Република Македонија“ а државјанството е „на поранешната југословенска Република Македонија“. Кодот на државата е МК, а ознаката за валутата МКД. Личната карта на Македонија е пополнета на шесте официјални јазици во ОН, англиски, француски, шпански, руски, кинески и арапски уште во 1993 година, со приемот на земјата во ОН.