
Скопје, 18 ноември 2010 (МИА) - Расчинетиот владика на Македонската православна црква Јован Вранишковски е приведен синоќа од бугарската полиција на граничниот премин Калотина, на бугарско - српската граница.
Во македонското Министерство за внатрешни работи потврдија дека бугарскиот Интерпол ги известил за задржувањето на Вранишковски и оти му е одредено 24 часовно задржување, по што ќе се знае дали бугарските надлежни органи ќе му одредат екстрадициски притвор и ќе одлучат за негова екстрадиција во Македонија.
Вранишковски е задржан врз основа на меѓународната потерница што на први овој месец ја издаде македонското ИНТЕРПОЛ биро, по наредба на Основниот суд Битола. Потерницата е издадена според член 239 од Кривичниот законик за кривичното дело „затајување“.
Јован Вранишковски, расчинет владика на МПЦ, официјално се претставува како егзарх на Српската православна црква во Македонија, преку т.н Македонската Православна Црква-Охридска архиепископија, која уште нема судска регистрација. Врз основа на правосилна пресуда треба да одлежи казна затвор од две години и шест месеци.