Струмица, 19 ноември 2010 (МИА) – Денешната шеста по ред акција „Ден на дрвото - Засади ја својата иднина“ за општина Василево има меѓународен карактер бидејќи во пошумувањето ќе учествуваат и граѓани од општина Струмјани, Република Бугарија.
Најпрво, група граѓани од Василево, предводени од градоначалникот Ванчо Стојанов, претпладнево заедно со месното население ќе посадат 1.000 садници во околината на Струмијани, Република Бугарија, а напладне истото ќе се случи и на локациите Брест и кај селата Едрениково и Требичино во општина Василево, каде што во пошумувањето на два хектара со околу 3.500 млади садници од бел и црн бор, чемпрес и багрем ќе учествуваат бугарски граѓани на чело со градоначалникот на Струмјани Валентин Челиков.
Покрај пошумувањето на одредените локации, акцијата “Ден на дрвото – Засади ја својата иднина“ денеска организирано се спроведува и во сите основни и средни училишта од Струмичкиот регион.