Астана, 30 ноември 2010 (МИА) – Македонскиот претседател Ѓорге Иванов утре и задутре во Астана, Казахстан, ќе учествува на Самитот на Организацијата за безбедност и соработка во Европа – ОБСЕ.
Лидерите на 56 земји членки на ОБСЕ, меѓу кои и претседателите на Русија Дмитриј Медведев, на Франција Никола Саркози, германската канцеларка Ангела Меркел..., како и првите луѓе на ОН Бан Ки-мун, на ЕУ Херман Ван Ромпуј и на ЕК Жозе Мануел Баросо, ќе дебатираат за иднината на Организацијата, за стабилизацијата на Авганистан, за релациите Русија – Грузија, политичката криза во Киргистан, за борбата против тероризмот и тровијата со дрога.
Предвидено е претседателот Иванов да има обраќање на собирот, како и повеќе билатерални средби. Активностите ги почнува денеска со средба со Нурсултан Назарбаев, претседателот на Казахстан - земјата домаќин и актуелен претседавач со ОБСЕ.
Самитот во Астана е прв по 11 години и седми во 35-годишната историја на ОБСЕ, која почна во 1975 година кога лидерите на тогашните Западна и Источна Германија Хелмут Шмит и Ерих Хонекер, претседателот на САД Џералд Форд и австрискиот канцелар Бруно Крајски го потпишаа Финалниот акт од Хелсинки, основачкиот документ на денешната Организација за безбедност и соработка во Европа.