Скопје, 2 декември 2010 (МИА) - Премиерот Никола Груевски го смета случајот со А1 телевизија за злоупотреба од страна на СДСМ и опозицијата за да се прикаже ситуацијата оти некој медиум е опседнат од полицијата.
- Тоа беше една злоупотреба на ситуацијата на државните институции кои сакаа да направат контрола во одредени фирми стационирани на „Перо Наков“ бб и обид за манипулација од тоа да се прикаже дека некој сака да направи некој медиум да биде опседнат од полицијата, изјави премиерот Груевски одговарајќи на новинарски прашања по промоцијата на новиот ангиограф на Клиниката за кардиологија во Скопје.
Според него, тоа не е изненадување. - СДСМ и во други наврати се обидувала да ја манипулира јавноста, меѓутоа времето ќе покаже дека тие се обиделе да извршат манипулација на граѓаните, истакна премиерот.
Тој појасни дека она што се случувало кај А1 телевизија, како што веќе и кажал во свое интервју, станува збор за асистенција за која судот издал наредба бидејќи претходно немало можност да се изврши контрола во шест фирми на ул. „Перо Наков“ бб.
Одговарајќи на новинарско прашање во врска со изјавите од СДСМ за рушење на оваа Влада на недемократски начин, рече дека тоа е израз на нервоза во опозицијата и СДСМ и на карактерот и делувањето на Бранко Црвенковски во изминатите години и децении. - Тоа е негов стил и стил на партијата за што се гордее и ја нарекува наследник на Комунистичката партија која знаеме на кој начин дојде на власт, рече премиерот Никола Груевски.
Тој потенцира дека за реклами на А1 телевизија не се трошени буџетски пари.