Скопје, 31 јануари 2010 (МИА) - Претходна расправија за девојка, според првичните сознанија на полицијата, е мотивот за нападот во средното средното хемиско училиште „Марија Кири Склодовска“ во кој се повредени професор и двајца ученици од трета година.
МВР соопшти дека инцидентот се случил околу 12:30 часот кога повеќе лица, меѓу кои неколку маскирани и со палки, ножеви и други предмети, влегле во училиптето и веднаш почнале насилнички да се однесуваат напаѓајќи ученици и еден професор.
На повреди се пожалиле неколку лица меѓу кои еден професор и двајца ученици кои со возило на Итна медицинска помош се префрлени во Ургентниот центар Скопје.
Со удар со остар предмет во пределот на грбот повредени се Г.Г. (29) професор по физичко и Ѓ.А. (17), ученик во трета година, а И.Р. (17) исто така ученик во трета година е повреден во пределот на главата од удар со тврд предмет. За точниот карактер на повредите се очекува извештај од надлежните медицински лица во Ургентниот центар.
Веднаш по пријавувањето на настанот полициски службеници од ПС „Аеродром“ и од мобилната единица „Алфа“ излегле на местото на настанот. Притоа се приведени четири лица И.А.(17), А.К.(15), А.К.(18) и Х.И.(17) сите од село Орланци, Скопско.
Полицијата презема мерки за утврдување на идентитетот на останатите учесници во инцидентот и неговото целосно расчистување, по што против нив ќе следуваат соодветни поднесоци до надлежните институции.