Скопје, 14 февруари 2011 (МИА) - Наташа Петровиќ која е меѓу десетте млади филмски актери што учествува на годинашниот Shooting Stars во рамки на Берлиналето запознала 64 кастинг-директори кои пристигнале во Берлин на покана на European Film Promotion, Филмскиот фонд на Македонија.
- Ова е навистина голем број и се случува првпат по оформувањето на овој проект, посочува Фондот.
Република Македонија првпат е официјално претставена на оваа манифестација на која на младите актери им се дава можност за соработка во идни филмски проекти.
На маркетот на Берлиналето, пак, утре ќе бидат прикажани два македонски филма - „Ова не е американски филм” во режија на Сашо Павловски и „Панкот не е мртов” во режија на Владимир Блажевски. На годинашниот маркет за копродукции режисерката Анета Лешниковска го презентира филмот „Бучно”, поддржан од Филмскиот фонд во програмата на филмски проекти од национален интерес за 2010 година.
Како што информира Фондот, завчера се одржа маркет прикажувањето на „Мајки“ на режисерот Милчо Манчевски. Филмот е копродукција меѓу Македонија, Франција и Бугарија. Тој ќе биде прикажан во програмата „Панорама“ во склоп на Берлинскиот филмски фестивал на 16, 17, 18, и две проекции на 19 февруари.