Скопје, 20 февруари 2011 (МИА) - Премиерот Никола Груевски во интервју за вечерниот дневник на ТВ Сител го повика лидерот на СДСМ Бранко Црвенковски да излезат на избори и да ја измерат довербата меѓу народот.
- Црвенковски повикува на предвремени избори, а поставува услови што не можат да се исполнат ни за шест месеци, рече Груевски, истакнувајќи дека сите барања на опозицијата се исполнети.
Според него, избори може да се одржат и според сегашниот Изборен законик и избирачки списоци кои се ажурирани, што го потврдил и претседателот на ДИК Александар Новаковски.
Груевски го повика Црвенковски уште утре да ги врати пратениците во Собранието за да се изгласаат измените на Изборниот законик и да се одржат избори на кои, според премиерот, ќе се види дека неговата партија ВМРО-ДПМНЕ ја има поддршката од народот.
Груевски рече дека негова обврска е да ја прекине штетата која и се предизвикува на Македонија од потезите кои ги влече Црвенковски и затоа цени дека изборите се решение. Тој смета дека граѓаните на тие избори врз основа на, како што рече, конкретните видливи проекти, на програмите и на кредибилитетот и довербата на политичарите и исполнувањето на ветувањата, ќе донесат правилна одлука.
Во врска со шпекулациите во медиумите за тоа што се разговарало на средбите во Вашингтон со потпретседателот Џо Бајден и државниот секретар Хилари Клинтон, Груевски повтори дека најголем дел од средбите биле за македонските евроатлански аспирации и прашањето за името.
- Повеќе од 70 - 80 проценти од разговорите беа поврзана со нашите евро-атлански интеграции, пред се за проблемот кој не спречува да ги оствариме нашите заложби, а тоа е проблемот со името што го наметна Грција, рече Груевски и додаде дека за другите работи пократко се дискутирало, а некои од нив биле само нафрлени.
Од наша страна, нагласи премиерот Груевски, извршивме презентација како е во Македонија во последните години и што е за нас предизвик во иднината.