Соработка меѓу списанието за литература „Стремеж“ и индиското списание за поезија „Инчентин версис“

Скопје, 19 април 2011 (МИА) - Македонското списание за литература, уметност и култура „Стремеж“ воспостави соработка со електронското списание за поезија „Инчентин версис“ со седиште во Индија.  Истовремено, поетот Јовица Тасевски-Етернијан, кој е уредник во редакцијата на „Стремеж“, е именуван и за уредник-консултант на „Инчентин версис“.


Соработката предвидува во „Стремеж“ да бидат објавени три селектирани поетски прилози со највисоки естетски вредности од „Инчентин версис“, препеани на македонски јазик, а за возврат, во секој број на индиското списание ќе биде одвоен простор за претставување на најмалку еден македонски поет.


„Инчентин версис“ е современо електронско списание за поезија што се објавува на англиски јазик и излегува четири пати годишно. Уредничкиот одбор на списанието има интернационален состав и во него покрај  индиски писатели се вклучени и автори од САД. Главен уредник е професор Рамеш Чандра Мукопадаја, магистер по англиски јазик, англиска книжевност и компаративна книжевност и доктор по индиска книжевност, а одговорен уредник е Сонет Мондал, еден од најафирмираните помлади индиски поети.

Покрај поезија, во списанието се објавуваат и критички осврти за поетски книги, како и научно-истражувачки трудови за познати светски автори.