Прилеп, 9 мај 2011 (МИА) - Балканската мега ѕвезда Здравко Чолиќ ќе биде главната атракција на годинашниов „Пиво фест“ што во Прилеп ќе се одржи на 16 и 17 јули годинава, најавуваат од локалната самоуправа која е организатор на манифестацијата.
Фестивалот на пивото и на скарата се одржува деветти пат, а последната вечер ќе биде резервирана за настапот на Чолиќ.
- Главна ѕвезда ќе биде Здравко Чолиќ, една од најголемите легенди на Балканот. Со него нема промашување, полни концерти, а и одамна не бил во Прилеп, што значи тоа ќе биде на општо задоволство, не само за прилепчани, туку и за сите посетители во Македонија. Главниот настап на Чолиќ е предвиден за 17-ти јули, на затворањето на Фестивалот, изјави градоначалникот на Прилеп Марјан Ристески.
Ристески информира дека се очекува дефинирање на сите детали и потпишување на договорот со Чолиќ, кој треба да настапи во придружба на 18 гудачи и балерини.
Ланскиот „Пиво фест“, кој се одржуваше четири дена го посетиле околу 300.000 посетители. Според пресметките, лани се испиле околу 240 тони пиво и биле изедени 123 тони скара.
За годинашнава програмата на „Пиво фест“ се преговара и со други пејачи од овие простори, како што е Харис Џиновиќ, групата Ван Гог од Белград и со познати македонски музички ѕвезди. Програмата треба да биде комбинација на македонска и на балканска музика.