Скопје, 12 јули 2011 (МИА) – Во Охрид денеска почнува работниот дел од Третата регионална средба на претседателите од регионот чиј домаќин е претседателот на Република Македонија Ѓорге Иванов, а на која ќе учествуваат неговите колеги од Албанија Бамир Топи, Црна Гора Филип Вујановиќ и од Косово Атифете Јахјага.
Според агендата, предвидени се билатерални средби на претседателите по што ќе следи и пленарен состанок на „четворката“.
Целта на овој, веќе традиционален, собир е одржување на дијалогот на највисоко ниво меѓу соседните земји во рамки на заедничката евро-атлантска перспектива.
Сферите на дискусија и заедничко дејствување се поврзани со теми од ЕУ и НАТО интеграциите кои треба да ги олеснат овие процеси - јакнење на демократските и реформските процеси, зголемена економска соработка и поттикнување регионални инвестиции, инфраструктурно и енергетско поврзување, прекугранична соработка во борбата против криминалот ...
Пораката што ќе ја испрати „четворката“, а ќе биде упатена и до Брисел и европските престолнини, е дека Македонија, Албанија, Црна Гора и Косово споделуваат европски вредности и идентична визија за иднината. Врвен приоритет за четирите земји е забрзана интеграција во Европската унија и во НАТО, а реализирањето на овие заеднички стратешки цели е можно само со интензивна билатерална, но уште позначајно, регионална соработка.
Од самитот, трет по ред во овој формат, се очекува да произлезат иницијативи за нови регионални проекти, особено во инфраструктурното и енергетското поврзување.
Во Охрид шефот на македонската држава ќе покрене и предлог доколку се појави ургентна потреба, и по примерот на земјите членки на ЕУ, претседателите од регионот, да се среќаваат почесто, а не само еднаш годишно. Регионалната лидерска средба, како форма на соработка, за Иванов, како што подвлекуваат од Кабинетот за МИА, останува отворена и за сите други земји од регионот, вклучувајќи ги Грција и Србија.
Според агедната, вечерва четворицата претседатели ќе присуствуваат и на отворањето на „Охридско лето“, најпрестижната културна манифестација во земјата која се одржува под покровителство на претседателот на државата.