„Расцепен ум“ од Братислав Ташковски, ново издание на „Макавеј“

Скопје, 21 јули 2011 (МИА) - Романот „Расцепен ум“ од познатиот македонски поет и романсиер Братислав Ташковски е најновото издание на Издаваќката куќа „Макавеј“ од Скопје.

„Расцепен ум“ претставува дел од прозната трилогија на Ташковски, во чии рамки  се издадени „Ако даде Господ“ и „Кафез од гревови“.

- Со ова дело Ташковски го продолжува своето книжевно мајсторство низ тема од постреволуционерното турбулентно време во Македонија, кога конфликтните ситуации и идеолошките недоразбирања доведуваат до своевиден климакс, истакнува литературниот критичар Данило Коцевски во препораката кон новиот роман на Ташковски.

Поетот Славе Ѓорѓо Димовски укажува дека „и со овој роман Братислав Ташковски ја потврдува својата творечка моќ која произлегува од силната верба во литературата, а во ова дело на еклатантен начин е раскажана македонската безнадежност како судбина која беше наметната во минатиот век“.

Братислав Ташковски е автор на повеќе поетски книги и публицистички дела.