Скопје, 15 февруари 2012 (МИА) - Снег со слаб до умерен интензитет и ветер со брзина и над 70 километри на час, најавува за утре и задутре Управата за хидрометеоролошки работи.
Во текот на ноќта и утре ќе има нови врнежи од снег со умерен интензитет во западните и северните, а со послаб во другите делови на земјава. Утре и во петок ќе дува умерен, повремено силен северен ветер, кој на моменти ќе достигнува брзина над 70 километри на час, особено долж Повардарието и во источните краишта.
Постепен пораст на дневните температури се најавува за време на викендот и почетокот на наредната недела, кога се очекува и топење на снежната покривка.