Скопје, 4 јуни 2012 (МИА) - Во текот на ноќта и утре ќе има промена на временската состојба во Македонија, која ќе биде условена од влажна и нестабилна воздушна маса од Медитеранот.
Времето ќе биде променливо облачно, посвежо и нестабилно со пороен дожд, грмежи и засилен ветер. Локално процесите ќе бидат поинтензивни, со услови за појава на невреме со град и силни електрични празнења, особено во источните делови од земјава.
Од среда ќе настапи постепена стабилизација на времето со пораст на температурата на воздухот.
Во случај на појава на електрични празнења, од Управата за хидрометеоролошки работи препорачуваат поголема внимателност, да не се престојува на отворен простор и под осамени дрвја.