Скопје, 28 јуни 2012 (МИА) - Лидерите на опозициските СДСМ и на ВМРО-Народна партија Бранко Црвенковски и Љубчо Георгиевски денеска одржаа средба на која се договориле во наредниот период да ја интензивираат комуникацијата и да воспостават соработка.
- Дали тоа на крајот ќе резултира и со формална предизборна коалиција ќе покаже времето, меѓутоа ова беше само почеток на еден процес и јас би рекол оптимистички почеток на тој процес, изјави по средбата Црвенковски.
Тој истакна дека и покрај тоа што со Георгиевски беа жестоки политички противници и меѓу нив сеуште постојат разлики, „чувствувале дека имаат заедничка обврска да направат се државата да се врати на нормален колосек“.
- Наша заедничка оценка е дека денес Македонија се соочува со исто толку тежок и сериозен предизвик како во 91-та и 2001 година. Состојбите во многу области се катастрофални, државата се движи во погрешна насока, економијата пропаѓа, сиромаштијата се зголемува, демократијата во Македонија е суспендирана, евроатлантските интеграции на земјата се целосно загрозени, рече Црвенковски.
Одговарајќи на новинарски прашања претседателот на СДСМ посочи дека во досегашните разговори со ВМРО-НП, ЛДП, ОМ и Достоинство во ниту еден момент никој не поставил никакви условувања и уцени. - Подготвени сме и имаме желба за соработка и со албанските политички субјекти, на истите принципи – без меѓусебни условувања и без уцени, посочи Црвенковски.