Награда „Струшко изгрејсонце” за битолскиот писател Добре Тодоровски Скопје, 9 мај 2013 (МИА) - Наградата „Струшко изгрејсонце“ за 2013 година ја доби писателот Добре Тодоровски од Битола, за романот „Прокоба” во издание на „Силсонс“. Наградата секоја година во Струга ја доделуваат издавачката куќа „Феникс” и Фондацијата за културна и научна афирмација и презентација „Македонија презент” од Скопје, со цел да се стимулира и вреднува македонското творештво за деца и млади.
Годинава наградата се доделува по четврти пат, а досега ја добиле писателите Киро Донев, Петко Шипинкаровски и Панде Манојлов.
Одлуката едногласно ја донеле членовите на жирито: Христо Петрески (претседател), Виктор Шеќеровски, Петко Шипинкаровски, Панде Манојлов и Светлана Ивановска (членови).
- Добре Тодоровски (1960) е раскажувач, романсиер и драмски писател. Неговите дела тематски се поврзани со настани од поновата историја, кои говорат за животот на човекот и народот, како белег на неговата опстојба на просторот од пошироката битолската околина. Карактеристично за неговото творештвото е тоа што во своите дела го користи народниот говор од нашето поднебје, со што се зачувуваат неговите локални белези... Романот „Прокоба“ е прозно четиво каде што писателот основата на самата приказна ја зема од народното живеење, верување или уверување на можностите за помош и заштита на луѓето, соопшти „Феникс“.
Тодоровски е член на Друштвото на писателите на Македонија од 2000 година, а од 2001 е член и на Македонското научно друштво-Битола. Главен и одговорен уредник е на научното списание „Прилози”. Добитник е на повеќе награди и признанија.
|