Скопје, 2 јули 2013 (МИА) - Премиерот Никола Груевски кој од вчера е во посета на Народна Република Кина, денеска во Пекинг ќе се сретне со претседателот на државата Си Џипинг и со премиерот Ли Кечианг.
Утре, македонскиот владин тим предводен од премиерот Груевски ќе присуствува и ќе се обрати на Конференцијата за соработка меѓу НР Кина и земјите од Централна и Источна Европа што ќе се одржи во градот Чонгкинг. Станува збор за иницијатива поттикната од кинеската Влада, а организирана од кинеското Министерство за надворешни работи и локалната самоуправа на Чонгкинг чија цел е интензивирање на економската и политичката соработка на Кина со земјите од Централна и Источна Европа.
Во рамки на економската турнеја за привлекување инвестиции, премиерот Груевски и владината делегација која ја сочинуваат министерот за надворешни работи Никола Попоски и министерот без ресор задолжен за привлекување странски инвестиции Веле Самак, ќе остварат и повеќе поединечни средби со претставници на кинески компании од различни сектори кои се потенцијални инвеститори во нашата земја.
Премиерот Груевски вчера, пред официјалниот почеток на посетата, имаше интервју за најголемата и најгледана кинеска телевизија CCTV која емитува вести на сите континенти и има повеќе од 70 меѓународни претставништва. Се осврна на билатералните односи меѓу Македонија и Кина во повеќе сфери, на можностите за остварување динамична економска соработка, на зголемувањето на трговската размена и на соработката на полето на инвестициите. Посебно ги акцентираше реформите и поволностите за вложувања кои Македонија ги нуди на глобалните компании, вклучително и кинеските.
Груевски ги повика кинеските компании да инвестираат во Македонија, посочувајќи дека нивните инвестиции се добредојдени во нашата држава која може да ја искористат како поволна позиција и порта за инвестиции, производство и продажба на производи на европскиот пазар. Ја истакна и поволната отворена опција за можност за креирање специјализирана технолошко-индустриска развојна зона наменета само за кинески компании кои се заинтересирани да инвестираат во нашата земја и оттука да го покриваат европскиот пазар.