Скопје, 18 октомври 2013 (МИА) - Претседателот на Државната изборна комисија (ДИК) Борис Кондарко денеска поднесе оставка, како што наведува во пишаната изјава, поради лични причини.
Кондарко информира дека поднел оставка на функцијата претседател на Државната изборна комисија и согласно одредбите од Изборниот законик побарал на првата наредна седница на Собранието да биде констатиран престанок на функцијата пред истекот на мандатот.
- Сметам дека дадов свој придонес во работата на Државната изборна комисија, а оставката ја поднесувам заради лични причини, посочува Кондарко во пишаната изјава.
Првата наредна седница на Собранието е закажана за в понеделник 21 октомври.
Борис Кондарко е претседател на ДИК на предлог на опозициската СДСМ. Пред два дена оттаму најавија дека тој најверојатно ќе поднесе оставка од лични причини.
Се очекува СДСМ со повеќе информации во врска со претседателското место на ДИК да соопшти на прес-конференција попладнево.