Поведена иницијатива за отворање италијански конзулат во Битола

Битола, 13 март 2014 (МИА) - Италијанскиот амбасадор Ернесто Масимино Белели денеска ја посети општина Битола каде се сретна со градоначалникот Владимир Талески со кого разговараше за повеќе теми во надлежност на локалната самоуправа.

- Италија и Македонија се блиски земји, врските меѓу нашите два народи се многу големи, а по денешната средба со градоначалникот Талески мислам дека имаме големи можности за соработка. Можеме да соработуваме во секторот култура, изучување на италијански јазик, учество на Битола во филмската продукција и копродукција што ја реализираат двете држави и создавање услови за работа на италијанските фирми и претприемачи со посебен фокус во земјоделскиот сектор, изјави амбасадорот Бенели.

Битола наскоро очекува отворање на италијански конзулат, директна соработка во реализацијата на проектот „Филмски град“ и италијански инвестиции што ќе овозможат нови вработувања.

- Италија недостига во милјето на почесни конзулати и збратимени градови со кои соработува Битола. Имаме конкретни предлози и очекувам наскоро да имаме почесен конзулат и нов збратимен град од нивната држава. На денешната средба го информирав амбасадорот за инвестициите во индустриската зона „Жабени“ и верувам дека во иднина ќе соработуваме со државата која има највисок процент на културно-историско богатство во светот, рече Талески по средбата.