Полицијата синоќа на повеќе локации направила претрес при што одзела телефонски картички под сомнение дека е направена измама со ниво учество во гласањето на Скопски фестивал. Во врска со случајот повикани се лица на разговор во Министерството за внатрешни работи.
Ова за МИА го потврди Министерството за внатрешни работи. Претресите се направени во повеќе локали во Скопје.
Портпаролот на МВР Иво Котевски потврди дека меѓу повиканите лица се наоѓаат и познати личности.
- Се работи за класична измама со која директно би се оштетил буџетот на Република Македонија. Имено, правилото гласи дека смее да се гласа само еднаш од еден телефон, а со организираното купување на телефонски картички и гласање од истите, се прекршува законот – изјави Котевски за „Република“.
На Фестивалот синоќа учествуваа 20 изведувачи, а првото место му припадна на Даниел Кајмакоски, втора беше Тамара Тодевска и трета Евгенија Чанчалова - Еги.