Американската војска загрижена за префрлањето на рускиот ракетен систем С-400 во Сирија

Вашингтон, 26 ноември 2015 (МИА) - Одлуката на  Русија во својата база во Сирија да го распореди најмодерниот противавионски ракетен систем С-400 предизвика „значајна загриженост“ кај американската војска, информираа официјални американски претставници.

Неименуван американски претставник за француските медиуми кажа дека овој систем „за секого претставува значајна закана“.

- Постои значајна загриженост што се однесува до воздушните операции во Сирија, наведе овој претставник.

С-400 имаат дострел од околу 400 километри, што значи дека може да продре длабоко на турска територија или може да претставува и потенцијална закана за авионите од  коалицијата, предводена од САД.

Москва најави дека во Сирија ќе го испрати својот најмодерен противавионски ракетен систем С-400, откако во вторникот турски ловци соборија руски воен авион на турско-сириската граница. Овој систем ќе биде распореден во базата Хмејмим.

Базата Хмејмим се наоѓа на подрачјето што го контролираат силите на сириската војска, а Русија ја користи за полетување на своите бомбардери кои одат во акции на уништување цели на Исламска држава во Сирија.