Исламска држава погубила над 3.500 луѓе во Сирија

Лондон, 29 ноември 2015 (МИА) - Исламска држава погубила над 3.500 луѓе во Сирија, од кои речиси 2.000 цивили, од прогласување на својот „калифат“ во јуни минатата година, соопшти денеска Сириската опсерваторија за човекови права.

Според податоците на оваа група за мониторинг со седиште во Лондон, ИД погуби 3.591 лица во Сирија, откако прогласи свој исламски „калифат“ по заземањето на големи делови од територијата на државата.

Новиот биланд опфаќа 1.945 цивили, меѓу кои 103 се жени и 77 деца.

Некои од нив се погубени поради наводно вештерство, хомосексуалност и соработка со коалициските сили предводени од САД, кои ги бомбардираат ИД во Сирија од септември 2014.

Меѓу убиените цивили се наоѓаат 930 припадници од сунитското племе Шаитат, кои се убиени во провинцијата Деир Езор минатата година откако се спротивставиле на сунитската екстремистичка група. 

ОН ја обвинија ИД за „злосторства против човештвото“.

Над 250.000 луѓе се убиени, а над четири милиони биле принудени да ја напуштат Сирија, од почетокот на конфликтот во земјата во 2011 година.