Обама со лидерите од Југоисточна Азија ќе направи финален чекор за „ребаланс“

Џакарта, 11 февруари 2016 (МИА) - Главна политичка тема во регионот на југоисточна Азија деновиве е најавената дводневна средба на американскиот претседател Барак Обама со шефовите на држави или влади на десетте членки на АСЕАН.

Белата куќа и официјално соопшти дека на 15 и 16 февруари претседателот на САД ќе биде домаќин на лидерите на Индонезија, Малезија, Брунеи, Сингапур, Филипините, Тајланд, Лаос, Камбоџа, Мјанмар и Виетнам.

На самитот што ќе се одржи во Санилендс, Калифорнија, како што е соопштено во Вашингтон, Барак Обама ќе го направи финалниот чекор за „ребаланс“ на глобалната политика на САД, кои инсистираат дека се важен чинител за политичката, економската и воена состојба во југоисточна Азија..

Аналитичарите оценуваат дека САД го прават „ребалансот“ поради тоа што нивната концентрација на настаните на Блискиот Исток, овозможила во југоисточна Азија да расте влијанието на Кина и Русија.

САД на средбите со лидерите од АСЕАН ќе го промовираат и својот став за поделбата на Јужното Кинеско Море на кое суверенитет прогласува Кина. Најавени се и сериозни разговори за смалување на набавките на оружје од Кина и Русија.

Денешниот влијателен „Џакарта пост“ ја коментира и изјавата на Белата куќа во која се вели дека „пријателите на САД од југоистона Азија не треба да бидат загрижени за односите со Вашингтон ако на претстојните претседателки избори победат демократите“.

Според оваа изјава, американски претседател од редовите на републиканците би ги вратил односите на слична ситуација од пред петнаесет години, кога САД не покажуваа интерес за унапредување на политичките и економски односи со држаите од АСЕАН.