Гатилов: Испраќање американски војници во Сирија е нелегитимно

Москва, 27 април 2016 (МИА) - Упатување американски војници во Сирија и нивно присуство таму е нелегитимно, изјави заменикот министер на Русија за надворешни работи Генадиј Гатилов, јави ТАСС.

- Тие немаат мандат на сириската влада, дополни Гатилов.

Претседателот на САД, Барак Обама неодамна одлучи  да испрати дополнителни 250 припадници на американските вооружени сили во Сирија, заради поддршка на локалните сојузници во напредување против таканаречената Исламска држава.

- Во деловите на северна и источна Сирија остварен е напредок во борбата против џихадистите кои се истерани од некои нивните упоришта, рече заменикот советник на Белата куќа за национална безбедност, Бен Роудс во обраќањето пред новинарите во Хановер каде Обама неодамна беше во посета.

- Сакаме да го забрзаме тој напредок и веруваме дека одлуката за испраќање американски војницич може да игра одлучувачка улога, наведе Роудс.

Тој прецизира дека војниците во Сирија нема да учествуваат во борбата на терен.

Американското списание „Волстрит џурнал“ наведува повикувајќи се на неименувани американски официјални лица, дека со тоа бројот на американскиот воен персонал во Сирија ќе се зголеми на околу 300.

Во меѓувреме, весникот „Рај ал јаум“ јави дека денеска околу 150 американски војници пристигнале на аеродромот Ремејлан, во североисточната сириска провинција Хасака. Изданието посочува дека американските војници биле транспортирани до Румејлан со хеликоптери на меѓународната коалиција, предводена од САД.

Реонот во кој пристигнале е под контрола на курдските Сили за самоодбрана. Сепак весникот не прецизира дека пристигнатите војници се од контингентот на американската армија за чие испраќање неодамна информираше Обама.