Трaмп не ја отфрла можноста за сојуз со Русија во борбата против ИДВашингтон, 26 јули 2016 (МИА) - Републиканскиот кандидат за Белата куќа, Доналд Трамп изјави дека, доколку биде избран за претседател на САД, ќе ја разгледа можноста за сојуз со Русија во борбата против терористичката групација Исламска држава, но ги отфрли гласините дека добива помош во кампањата од рускиот преседател Владимир Путин.
На митинг во Винстон Салем, во Северна Каролина, Трамп ги отфрли обвинувањата и инсинуациите дека разузнавачките служби на Путин можеби имаат удел во хакерскиот напад во мејл преписките на Националниот комитет на Демократската партија.
Роби Мук, раководителот на предизборниот штаб на Хилари Клинтон, претходно обвини дека е многу веројатно руски хакери да „влегле" во електронската кореспонденција за да им наштетат на демократите и со тоа да му помогнат на Трамп.
- Не сметам дека случајно тие мејлови протекоа вечерта спроти нашиот Конгрес и мислам дека тоа е прилично симптоматично, рече Мук за Си-Ен-Ен.
Трамп пак, на тоа одговори дека тоа е една од „најчудните теории на заговор", за коишто кога било ги чул и додаде дека никогаш не се сретнал со Путин.
- Но, ако подобро размислите, нема ли да е добро да се договориме со Русија? Не ќе ли е убаво, ако заедно со Русија ја уништиме ИД? - запраша Трамп на собирот.
|