Вашингтон, 15 септември 2016 (МИА) - Кандидатката на Демократската партија за претседателските избори во САД, Хилари Клинтон објави денеска нови информации за својата здравствена состојба, со лекарскиот заклучок дека е здрава и подобна за извршување на претседателскиот мандат.
Клинтон закпренува од „благо и лесно“ воспаление на белите дробови, кое и беше дијагностицирано, откако и се слоши во неделата на комеморацијата за жртвите на терористичките напади извршени во САД на 11 септември 2001 година.
Поранешната државна секретарка (68) „и натаму е здрава и подобна да биде претседател на САД“, напиша нејзината лична лекарка Лиза Бардак во деталниот „преглед на нови информации“ на две страници за здравствената состојба на Клинтон.
Бардак ги објави лабораториските наоди на Клинтон, кои покажуваат нормални вредности на холестеролот, триглицеридите и другите клучни параметри.
- Останатите резултати од нејзиниот систематски преглед се во границата на нормалата и таа е во одлична ментална состојба, наведе лекарката.
Таа додаде дека крвниот притисок на Клинтон е релативно стабилен, а од воспалението на белите дробови добро закрепнува, со користење антибиотик и одмор.
Доналд Трамп во меѓувреме ги предаде резултатите од неговиот систематски преглед на лекар во телевизиска емисија. Неговиот предизборен штаб сепак засега нема да ја открие содржината на документот.
Трамп се појави во „Шоуто на доктор Оз“, во кое темата е „неговата целокупна благосостојба и медицинската историја на неговото семејство“. Кандидатот за претседател на Републиканската партија му врачи на Мехмед Оз една страница, која ги содржи резултатите од прегледот, извршен минатата недела од неговиот долгогодишен лекар. Емисијата ќе биде емитувана утре и тимот на Трамп засега одбива да ги објави резултатите од прегледот.