Брисел, 4 октомври 2016 (МИА) - Американскиот државен секретар Џон Кери денеска изјави дека САД не се откажуваат од мирот во Сирија и покрај одлуката да ги суспендираат директните американско-руски преговори за примирје, пренесе Танјуг.
-Да бидам јасен. Не се откажуваме од сирискиот народ, ниту од напорите за мир. Ќе сториме се за да создадеме мирна, стабилна, неподелена Сирија, рече Кери во говорот на темата „Иднината на трансатлантските односи“ во организација на германскиот „Маршалов фонд во САД“ од Брисел.
Кери додаде дека Вашингтон и Москва и натаму ќе разговараат за Сирија во рамки на широките мултилатерални преговори, и дека ќе водат сметка за тоа на нивните воени авиони во Сирија да не им се вкрстат патиштата.
Американскиот државен секретар, меѓутоа, ја критикуваше Русија, изјавувајќи дека Москва ја отфрли дипломатијата и одлучи да му помогне на сирискиот претседател Башар ал-Асад да ги порази бунтовничките групи.
При тоа, како што додаде, „Русија се прави дека не гледа“ дека режимот на претседателот Асад користи гас хлорин и барел бомби против сопствениот народ.
- Сирискиот режим и Русија ја отфрлија дипломатијата, рече тој.
САД ќе продолжат со воените напори против таканаречната Исламска држава, за да се најде трајно политичко решение и на Сиријците да им се овозможи да се вратат во своите домови и на тој начин да ја ублажат мигрантската криза во Европа, рече Кери.