Празни полици во продавниците и долги редови на бензинските пумпи се честа глетка на патиштата на југоисточниот брег на САД во момент кога граѓаните од приморските места се подготвуваат за евакуација поради ураганот Метју.
Метеоролозите се уште не се сигурни колку силен ќе биде ударот од ураганот кога ќе стигне до САД, но Јужна Каролина се подготвува да евакуира речиси една четвртина од населението, додека другите сојузни држави ја активираа Националната гарда.
Граѓаните почнаа да прават залихи, а во некои продавници снема леб, млеко и батерии.
Во Флорида, Џорџија, Северна и Јужна Каролина прогласена е вонредна состојба поради доаѓањето на ураганот од категоријата три преку Карибите, а се очекува во текот на неделата да го погоди брегот на САД.
Се предвидува ураганот да го погоди брегот на Јужна Каролина в сабота, а ветерот да се движи до 160 километри на час.
Во налет на ураганот во Доминиканска Република загинаа четири лица, а оштетени се 200 куќи, а властите евакуираа 800 луѓе.
Претходно, ураганот Метју на Хаити усмрти три лица.