Њујорк, 23 ноември 2016 (МИА) - Новоизбраниот американски претседател Доналд Трамп го планира поранешниот претседателски кандидат на Републиканската партија, Мит Ромни, за главен кандидат за функцијата државен секретар, информира ТАСС.
Според податоците на весникот „Волстрит журнал“, Трамп во моментов е расположен функцијата прв американски дипломат да му ја понуди на Ромни, човек кој е познат со своите антируски ставови.
Некои од соработниците на Трамп, меѓутоа, се залагаат за кандидатурата на поранешниот градоначалник на Њујорк, Рудолф Џулијани или, пак, ако тоа не мине да се продолжи со барање соодветен кандидат, забележува весникот.
Новоизбраниот претседател веројатно за шеф на Пентагон планира да го предложи генералот во оставка, Џејмс Матис, а постојан претставник на САД во ОН најверојатно ќе стане гувернерот на државата Јужна Каролина, Ники Хејли, додава „Волстрит журнал“.
За време на својата предизборна кампања во 2012 година, Ромни Русија ја нарече „геополитички противник број 1 на САД“, но загуби на изборите против Барак Обама, потсети ТАСС.
Во последните месеци Ромни редовно го критикуваше Трамп и одби да да го поддржи пред изборите.