Париз, 4 април 2017 (МИА) - Шефот на француската дипломатија Жан-Марк Еро денеска побара вонредна седница на Советот за безбедност на Обединети нации поради сомневањето дека во сириската провинција Идлиб е извршен напад со хемиско оружје.
- Утрово е извршен нов и посебно сериозен хемиски напад во провинцијата Идлиб. Според првичните податоци има голем број жртви, вклуѕчително и деца. Го осудувам нападот. При такви сериозни акции, што ја загрозуваат меѓународната безбедност, повикувам никој да не биде иземен од одговорност. Затоа барам вонредна седница на СБ на ОН, посочи Еро.
Тој додаде дека Европа не може да има улога во обновата на Сирија без охрабрувачка транзиција.
И претседателите на Турција и на Русија, Реџеп Таип Ердоган и Владимир Путин разговараа за наводниот напад со хемиско оружје во Идлиб, кој е под контрола на сириските бунтовници, соопштија денеска извори блиски до турскиот претседател.
Според здраствените работници и набљудувачите, во нападот, за кој се верува дека е изведен од сириски воени авиони, загинале најмалку 58 луѓе, меѓу кои 11 деца помлади од осум години.
- Ердоган се осврна на употребата на хемиско оружје кон цивилите во Идлиб. Тој истакна дека таквите нехумани напади се неприфатливи, изјави неименуван извор.
Ердоган и Путин го истакнале и значењето за одржување на примирје во Сирија.
Претходно, Сириската опсерваторија за човекови права соопшти дека руски или сириски воени авиони извршиле напади врз градот Хан Шејхоун во Идлиб што е под контрола на бунтовниците.
Неименуван извор од сириската армија потврди дека во нападот не е користено хемиско оружје, иако дел од медиумите јавија за можна употреба на таков вид оружје.