Њујорк, 5 април 2017 (МИА) - САД, Велика Британија и Франција доставија вчера до Советот за безбедност на Обединетите нации нацрт-резолуција, со која се осудува нападот со хемиско оружје во Сирија и се повикува за брза и итна истрага.
Во текстот се повикува Организацијата за забрана на хемиско оружје брзо да ги претстави заклучоците за нападот, во кој загинаа 58 лица, а ранети беа 170. Нападот се случи во гратчето Хан Шејхун, што се наоѓа во бунтовничка зона во северозападната сириска провинција Идлиб.
Сириските власти се должни да им ги достават на истражните комисии плановите за летовите, листите со патници и секоја друга информација за воздушните операции од 4 април, се вели во документот.
Од Дамаск се бара и на меѓународните експерти да им ги предаде имињата на сите лица, кои командуваат со хеликоптери и итно да овозможи пристап до авиобазите, од кои се претпоставува дека се извршени нападите со хемиско оружје.
Доколку резолуцијата биде усвоена на генералниот секретар на ОН, Антонио Гутереш ќе му биде наложено на секои 30 дена да известува за тоа како сириските власти соработуваат со истрагата.
Руското Министерство за одбрана соопшти вчера дека нападот врз источните квартови на Хан Шејхун бил извршен од сириската авијација.