Њујорк, 13 април 2017 (МИА) - Американските разузнавачки служби пресретнале разговори во кои сириските војници и експерти за хемиско оружје ги разгледувале подготовките за користење на бојни отровни супстанци во сириската провинција Идлиб, јави синоќа телевизијата Си-Ен-Ен, повикувајќи се на неименувани извори од американската Влада.
Пресретнатите податоци биле дел од огромниот број информации, што САД ги собираат во Сирија и Ирак.
Си-Ен-Ен не даде дополнителни детали за разговорите.
Телевизијата посочи дека Вашингтон претходно не бил информиран за нападот поради огромниот обем на собрани информации, што најчесто остануваат необработени.
Но, откако се случи нападот со хемиско оружје во провинцијата Идлиб, САД веднаш почнаа да ги анализираат собраните разузнавачки податоци со цел да го откријат виновникот за нападот, забележа Си-Ен-Ен.
Телевизијата цитира наводи од американски официјални претставници, според кои, нема сомнение дека одговорноста за користењето на хемиското оружје ја сносат силите кои се поддржани од сирискиот претседател Башар ал Асад.
Си-Ен-Ен наведе дека во пресретнатите разговори, американските разузнавачки служби не откриле податоци што покажуваат дека руските вооружени сили имале некаква комуникација во врска со нападот во Сирија.