Поранешниот директор на ФБИ, Џејмс Коми изјави денеска дека обвинувањата од американскиот претседател Доналд Трамп дека Федералното биро е во хаос, се лаги.
Коми го изјави тоа пред сенатска Комисија за разузнавање во негово прво појавување во јавност по отказот што му го врачи Трамп на 9 мај.
– Аргументите на Трамп дека ФБИ е неефективен ги сметам како клевета за мене и за ФБИ, изјави тој.
– Објаснувањата за моја смена ме збунија и сериозно ме загрижија, истакна Коми.
Коми изјави пред сенатската Комисија дека „несомнено Русија се вмешала во изборниот процес во САД во 2016 година“.
Се очекува тој да даде објаснување и за вмешаноста на Трамп во истрагата за Русија и нејзиното влијание во претседателските избори во САД.
Сенаторите сакаат да слушнат од Коми каква била неговата улога во проценката на американските разузнавачки служби дека Русија се вмешала во изборите минатата година.
Седницата се емитува на сите големи телевизиски канали во САД. Си-Ен-Ен објави дека Трамп во Белата куќа го следи сведочењето на Коми во друштво со правниот советник Марк Касовиц. На Твитер денеска е популарен хаштагот #ComeyDay.
Трамп вчера објави дека за нов директор на ФБИ ќе го именува Кристофер Реј, кој работел во Министерството за правда за време на администрацијата на Џорџ Буш помладиот.