САД ќе продолжат да примаат бегалци од 11 земји, претежно од Блискиот Исток и Африка, кои беа окарактеризирани како високо ризични, но со дополнителни проверки.
Американски функционери уверуваат дека националноста нема да биде причина за одбивање, но оние кои ќе сакаат да влезат во земјата ќе бидат предмет на дополнителни проверки.
Министерството за внатрешна безбедност го заврши 90-дневен процес на преразгледување на програмата за прием на бегалци во САД по консултации со други агенции и служби.
Целта беше да се исклучи ризикот од влез во САД на лица од 11 земји кои се закана за безбедноста и благосостојбата на земјата.
Министерството не го објави список на државите, но според информации во американските медиуми, на него се Египет, Иран, Ирак, Јемен, Северна Кореја, Либија, Мали, Сирија, Сомалија, Судан и Јужен Судан.
Новите мерки на прес-конференција во центарот „Вудроу Вилсон“ ги соопшти министерката за внатрешна безбедност Кирстен Нилсен. Таа изјави дека промените имаат за цел земјата подобро да ја заштитат од терористи, криминалци и крадци.
Од 25 октомври, кога влезе во сила 90-дневното преразгледување на програмата за прием на бегалци, од овие 11 земји во САД биле пуштени само 46 лица, покажуваат податоци на Стејт департментот.