Брисел, 9 септември (МИА) - НАТО не ја разгледува можноста за повлекување на своите сили од Авганистан во услови на сегашните зголемени политички и безбедносни проблеми во земјата, се наведува во денеска објавената писмена изјава на генералниот секретар на Алијансата, Андрес Фог Расмунсен.
Во изјавта објавена од прес-службата на неговиот Кабинет, Расмусен изразува вознемиреност поради засилените критички тонови во врска со воените напори на НАТО во Авганистан.
- Знам на што се должи тоа. Ние губиме војници од нашите земји при нападите на талибанците, наведува Расмусен.
Според него, тврдењата за измами на неодамнешните претседателски избори во Авганистан предизвикуваат вознемиреност и многумина наведуваат на помисла дека во земјата нема доволно брз напредок.
- Ние треба да останеме и ќе останеме во Авганистан, онолку долго колку што ќе биде неопходно. Никој нека не мисли дека е можно брзо движење кон излезот, се додава во изјавата.
Расмунсен смета дека НАТО би платил многу повисока цена доколку сега го напушти Авганистан, бидејќи тоа би го дестабилизирало и Пакистан и останатите земји во Централна Азија и би ги охрабрило екстремистите ширум светот.