Кабул, 16 септември (МИА) - Постои можност околу 1,5 милиони гласови да се фалсификувани за време на претседателските избори во Авганистан, кои се одржаа на 20 август, изјавија денеска во Кабул набљудувачите на Европската унија.
Според европските набљудувачи три четвртини од спорните гласачки ливчиња биле пуштени во корист на сегашниот претседател Хамид Карзаи.
При пребројување на 92,9 проценти од гласовите претседателот Карзаи освои 54,3 отсто и речиси со два пати повеќе гласови води пред неговиот главен политички ривал, поранешниот министер за надворешни работи Абдула Абдула, кој освои 28,1 проценти од гласовите.
Независната избирачка комисија претходно соопшти дека 2,15 проценти од гласачките ливчиња се поништени поради изборни нерегуларности.
Локалната комисија за истражување на легитимноста на изборите вчера информира дека гласачките ливчиња во десет проценти од избирачките места во Авганистан ќе бидат преразгледани и повторно преброени поради сомнение за измами.