Њујорк, 25 септември (МИА) - Индија нема да го потпише Договорот за неширење на нуклеарно оружје и го смета за „дискриминациски“, изјави државниот министер за надворешни работи Шаши Тхарур.
Индискиот министер ја коментираше резолуцијата донесена вчера на средбата на врвот на Советот за безбедност во кој има повик до сите држави да се присоединат кон договорот.
- Се додека одредени држави поседуваат нуклеарно оружје, ние не можеме да го поддржиме тој дискриминациски договор, со кој едни имаат право на такво оружје, а други не“, изјави тој.
Во Питсбург специјалниот пратеник на индискиот премиер Шијам Саран изјави дека Индија која има нуклеарно оружје, нема да потпише таков договор. Според него, државата поддржува нуклеарно разоружување и ќе се придржува кон мораториумот за нуклеарни проби. Ставот на Њу Делхи беше образложен и во писмо од индискиот амбасадор во ОН Хадрипа Сингха Пури во кое се вели дека државата не може да се согласи со повикот за потпишување на Договорот за неширење нуклеарно оружје.