Њујорк, 25 септември (МИА) - Иранскиот претседател Махмуд Ахмадинеџад изјави денеска на прес-конференција во Њујорк дека САД, Велика Британија и Франција „ќе зажалат“ поради тоа што го обвинија Иран дека го криел постоењето на објектот за збогатување ураниум, нагласувајќи оти тој објект не е таен.
Тој истакна дека Иран навремено ја информирал Меѓународната агенција за атомска енергија за објектот, кој денеска западните лидери го означија како предизвик за меѓународната заедница.
- Тоа не е таен објект. Доколку беше зошто би ја информирале МААЕ за него една година порано. Тие (САД, Велика Британија и Франција) ќе зажалат за нивните зборови, рече иранскиот претседател.
Ахмадинеџад истакна дека неговата земја ги испочитувала сите барања на МААЕ, меѓу кои и да ја информира Агенцијата за секој нов објект за збогатување ураниум шест месеци пред тој да почне со работа.
Тој истакна дека новиот објект ќе почне со работа најрано по 18 месеци и додаде дека Иран воопшто не ги нарушил правилата на МААЕ.
Ахмадинеџад изјави дека не претставува никаков проблем инспекторите на МААЕ да го посетат објектот.
Тој исто така нагласи дека нуклеарното оружје е нешто што му припаѓа на минатиот век и повика за глоблно нуклеарно разоружување.